කලාව රස වින්දන මාධ්‍යයක් පමණක් නොවේ.......
දවස පුරා රැකියාවේ යෙදෙන බොහෝ දෙනා සවස් වරැවේ රෑපවාහිනිය අබියසට පැමිණ ටෙලි නාට්‍ය රස විදීමට පුරැදු වී සිටිති.එසේ නැතිනම් සති අන්ත නිවාඩු දිනයක දී චිත්‍රපටයක් නරඹන්නට සිනමා ශාලාවට යති.ඒකාකාරි ජීවන රටාවක් තුළ ජීවත් වන ජනතාව සිය විඩාබර දිවියට මද අස්වැසිලිලක් ලබා ගන්නේ කලා රස වින්දනයෙනි.නමුත් කලාව රස වින්දන මාධ්‍යයක් පමණක් නොවේ.මිනිස් හදවත නිවා සුවපත් කරන්නට සමත් ප්‍රබල මාධ්‍යයකි.
කලා නිර්මාණ මිනිසාගේ හදවත සෞම්‍ය කරයි.මිනිසාට සිය ජීවිතය පිළිබද යථාවබෝධය ලබා දෙන්නේ කලාවයි.කලාකරැවාගේ හදවත සංවේදීය.කලාව මිනිස් හදවතේ කරැණාව,දයාව නිර්මාණය කරයි.වර්තමානයේ දිනෙන් දින ඉහළ යන අපරාධ රැල්ලට ප්‍රධානම හේතුව වන්නේ මිනිසා කලාවෙන් ඈත් වීමයි.වර්තමාන තරගකාරී සමාජ රටාවේ අතර මං වූ මිනිසා මුදල් පසුපස ලුහුබදිනිනේ උමතුවෙනි.සියලුම සමාජ සාරධර්ම,හර පද්ධතීන් මුදලට තක්සේරැ වෙයි.එවන් සමාජයක ජීවත් වන මිනිසුන් යමක සුන්දරත්වය දකින්නට උත්සාහ කරන්නේ නැත.අනෙකා තලා පෙලා මරා හෝ තම කාර්යය කර ගැනීමට මාන බලන මිනිසුන් සමාජයේ බහුලය.එවන් ජන සමාජයකට කලාව ආශිර්වාදයකි.
අද පාසල් විෂය මාලාවේ සංගීතය,නැටුම්,සාහිත්‍යය විෂයයන්ට හිමි වන්නේ අඩු වැදගත්කමකි.පාසල් සිසුන් අතර ප්‍රචන්ඩත්වය උග්‍ර වීමට එය දඑක් හේතුවකි.නමුත් කලාව සැම විටම නොදැමුණු සිත් දමනය කරයි.වේදනාව විදින හදවතට සතුට රැගෙන එයි.කලාවේ ශ්‍රේෂ්ඨත්වය එයයි.
කලාකරැවා බොහෝ සංවේදි පුද්ගලයෙක් වුවත් දැනුමෙන් සන්නද්ධ පුද්ගලයෙකි.ඔහු තම කලා නිර්මාණයන් තුළින් ජන හද පෝෂණය කරයි.කලාකරැවා ජනතාවට අවශ්‍ය නිවැරදි මග පෙන්වීම ලබා දීමට යොදා ගන්නේ සිය කලා නිර්මාණයන්ය.බොහෝ චිත්‍රපටි,ටෙලි නාට්‍ය,වේදිකා නාට්‍ය අවසන් වන්නේ මිනිසුන්ට යමක් හිතන්නට ඉතිරි කරමිනි.මේ නිසා ජන විඥානය පුබුදු කිරීමෙහි ලා කලාවෙන් ඉටුවන මෙහෙය මෙතෙකැයි කිව නොහැකිය.
නමුත් කලාව වෙළදාමක් කරගන්නට උත්සාහ කරන ඇතමුන් නිසා වර්තමානයේ කලාවට සිදු වෙමින් යන විනාශය අතිශයින් කණගාටු දායකය.මුදල් උපයා ගැනීමේ පරමාර්ථය පමණක් ඇතිව ඇතැම් චිත්‍රපටි නිෂ්පාදකවරැන් වැඩිහිටියන්ට පමණක් සීමා වූ චිත්‍රපටි නිර්මාණය කිරීම විශාල සමාජ අර්බුදයකි.මෙවැනි චිත්‍රපටි නරඹන්නට යන ප්‍රේක්ෂකයින්ගේ මනස අතර මං වීම විනා ඔවුන්ට ලැබෙන වෙනත් ප්‍රතිලාභයක් නම් නැත.
කලාව සැබෑ ලෙසම රස වින්දන මාධ්‍යයකි.නමුත් රස වින්දනයෙන් ඔබ්බට ගිය ගැඹුරැ ජීවන දර්ශනයක් ඒ තුළ ඇත.මේ නිසා කලාව මිනිසා සුවපත් කරයි.මිනිස් හදවත නිවා සනසාලයි.කලාවේ මුවාවෙන් මුදල් උපයා ගැනීමට උත්සාහ කරන්නේ නම් එය කලාව විකුණාගෙන කෑමකි.කලාව කලාව ලෙසට පැවතිය යුතුය.වාණිජ පරමාර්ථයන් සදහා කලාව යොදා ගැනීමෙන් සිදු වන්නේ කලාව විනාශ වී යාම පමණි.
No comments:
Post a Comment